Í sumar á ferðalagi okkar um Vestfirðina heimsóttum við veitingastaðinn Vegamót á Bíldudal. Þar fékk ég dásamlegt kjúklingasalat í hádeginu sem ég gat ekki hætt að hugsa um. Ég mundi svona sirka hvað var í því, skoðaði myndina mína og matseðilinn hjá þeim vel og vandlega og ákvað að reyna að herma þetta eftir.
Það er oft svo góð sweet chili mangósósa finnst mér í salötum og öðru á veitingastöðum en síðan er erfitt að finna slíka sósu á flösku í matvöruverslunum. Ég ákvað því að búa til mína eigin mangósósu sem var alveg æðisleg en auðvitað ef þið finnið góða slíka í búðinni má að sjálfsögðu prófa að nota slíka í staðinn.
Kjúklingasalat ala Vegamót
Fyrir 3-4 manns
Kjúklingasalat
- 4 kjúklingabringur
- Iceberg salat
- Tómatar
- Mangó
- Mangó-chili sósa (sjá uppskrift hér að neðan)
- 5 msk. Hellmann‘s majónes
- 4 tsk. grænt pestó
- Til hamingju Chili jarðhnetur
- Salt og pipar eftir smekk
- Ólífuolía til steikingar
- Útbúið mangó-chili sósuna og geymið fram að notkun (þetta mætti þess vegna gera daginn áður en allt í lagi bara rétt áður en þið hefjist handa við eldamennskuna líka).
- Berjið kjúklingabringurnar niður til að þynna þær vel, steikið upp úr ólífuolíu stutta stund á hvorri hlið. Saltið og piprið eftir smekk og setjið í 180°C heitan ofn í um 10 mínútur til viðbótar. Útbúið salatið á meðan.
- Skerið niður iceberg, tómata og mangó og raðið á fat/í skál.
- Hrærið saman majónesi og pestó, setjið í lítinn poka og klippið gat á endann, geymið.
- Saxið chili jarðhnetur og geymið.
- Þegar kjúklingurinn er tilbúinn má setja vel af mangósósu yfir hvern bita, skera hann niður og raða á fatið, næst má setja smá pestómajónes yfir til skrauts og að lokum strá vel af söxuðum chilihnetum yfir allt.
- Gott er að hafa afganginn af mangósósu, pestómajónesi og chilihnetum í skálum til að hver og einn geti skammtað sér að vild með salatinu.
Mangó-chili sósa
- 2 x þroskað og mjúkt mangó
- 2 rauð chili (fræhreinsuð)
- 1 gul paprika
- 100 ml vatn
- 100 ml edik
- 150 g sykur
- 2 cm rifin engiferrót
- 2 rifin hvítlauksrif
- ¼ tsk. salt
- Skerið mangó, chili og papriku smátt niður og setjið ásamt öllum öðrum hráefnum í pott.
- Hitið að suðu og leyfið síðan að malla í um 20 mínútur.
- Takið af hitanum og maukið með töfrasprota, leyfið að kólna niður fram að notkun.
- Hægt er að setja í krukku, loka vel og geyma í kæli.
Þetta salat er æðislegt og gaman að breyta aðeins út af vananum og prófa eitthvað nýtt. Það er alveg rosalega gott að hafa þessar chili hnetur út á salat, mmmmmmmmm!
Megið endilega fylgja Gotterí líka á INSTAGRAM
