Það er engin nýlunda að ég komi með einhvers konar útfærslu af marengskökum hingað inn á bloggið en þær eru bara svo einfaldar, fljótlegar, fallegar og dísætar!
Elsta dóttir mín varð 15 ára um daginn og hún elskar púðursykurmarengs. Við vöktum hana því með nýbökuðum brauðbollum, þessum marengsdraum og fjalli af Krispy Kreme kleinuhringjum því hún elskar þá líka!
Hún hélt fyrst partý fyrir skautavinkonur sínar og síðan gistupartý fyrir skólavinkonurnar fyrir utan fjölskyldudekur á afmælisdaginn sjálfan svo þetta voru alveg nokkrir dagar af fagnaðarlátum 🙂 Ég fæ helst ekki lengur að hjálpa henni við afmælisundirbúning því hún vill sjá um allt sjálf en ég laumaðist nú aðeins til þess og set inn litla frétt á næstunni úr öðru afmælinu hennar.
Hér kemur hins vegar þessi æðislegi marengsdraumur fyrir ykkur að prófa!
Marengsdraumur uppskrift
- 4 eggjahvítur
- 4 dl púðursykur
- 400 ml rjómi
- Ferrero Rocer kúlur
- Nóa kropp
- Þeytið saman eggjahvítur og púðursykur þar til stífþeytt.
- Teiknið hring um 25 cm í þvermál á bökunarpappír og dreifið marengsblöndunni jafnt í hring.
- Bakið við 160°C í 45 mínútur og leyfið að kólna í ofninum.
- Þeytið rjómann og smyrjið yfir botninn.
- Skerið niður Ferrero Rocer kúlur og dreifið yfir rjómann ásamt Nóakroppi, fallegt er síðan að sigta smá bökunarkakó yfir allt saman í lokin.
