Ég veit ekki hvar ég á að byrja núna þar sem þetta var mögulega ein af bestu hugmyndum sem ég hef fengið þegar kemur að sykurbombu! Maðurinn minn á fjögur systkini og reynum við alltaf að hittast og eiga góða stund þegar eldri systir hans er á landinu frá Noregi. Um daginn elduðum við lambakjöt með bernaise sósu og eins og svo oft áður kallar bernaise á marengs…..já eða öfugt 🙂 
Ég eeeeeelska púðursykurmarengsinn hans pabba og mig langaði að búa til eina risa fjölskyldupavlou með púðursykursbotni, sem endaði síðan svo stór að hún þurfti að fara á trébakka þar sem hún komst ekki fyrir á kökudisk!
Ef ykkur vantar fáránlega góðan „desrétt“ þá mæli ég með þessari bombu!
Fjölskyldubomba uppskrift
Botn og marengstoppar
- 5 eggjahvítur
- 5 dl púðursykur
Toppur
- 600 ml rjómi
- Þristur 10 stk mini (í pokunum)
- 3 x kókosbollur (hver skorin í 3 bita)
- 10 marengstoppar
- 250 gr jarðaber
- 125 gr bláber
Lakkríssósa
- 10 stk lakkrískaramellur frá Karamel Kompagniet (fást í Dimm netverslun)
- 3 msk rjómi
- Byrjið á því að baka botn og marengstoppa (þetta má alveg gera nokkrum dögum fyrr). Þeytið saman eggjahvítur og púðursykur þar til topparnir verða stífir og halda lögun sinni. Setjið nokkrar sleifar af blöndunni í sprautupoka með hringlaga stút um 1,5 cm í þvermál fyrir toppana. Teiknið hring um 25-30 cm í þvermál á bökunarpappír (á bökunarplötu) fyrir botninn og smyrjið restinni af marengsinum jafnt í hring. Bakið við 140°C, toppana í 40 mínútur en botninn áfram í 20 mín til viðbótar (samtals í klukkustund) og kælið alveg.
- Þeytið rjómann og smyrjið yfir marengsbotninn. Skerið þrist og kókosbollur niður og raðið ofan á rjómann ásamt jarðaberjum, bláberjum og marengstoppum.
- Bræðið saman lakkrískaramellur og rjóma við vægan hita þar til þykk lakkríssósa myndast. Leyfið hitanum að rjúka aðeins úr og setjið vel af sósu yfir allt saman.
