Þessa humarvindla smakkaði ég fyrst hjá Henný vinkonu. Hún sendi mér uppskriftina og sá ég að hún hafði birst í dagatali Íslandsbanka fyrir mörgum árum svo það er líklega hægt að rekja söguna langt aftur í ættir!
Þetta er svo brjálæðislega gott og alls ekki svo mikið mál að útbúa. Það er hægt að hafa þetta sem forrétt eða smárétt á hlaðborði, já eða auðvitað bara hvað sem er, líka hádegissnarl á sunnudegi eins og þessir enduðu á að verða. Dagsbirtan er nefnilega ekkert sérstaklega mikið að vinna með okkur matarbloggurunum í desember! Ætli þetta sé ekki um kortér á dag þar sem er gluggi til að taka fallegar myndir svona ef það yfir höfuð birtir eitthvað, hahaha.
Humarvindlar uppskrift
- 1 stórt hvítt samlokubrauð
- 1 askja skelflettur humar (um 300-400gr)
- 180 g smjör
- 2 x hvítlauksrif (pressuð)
- 1 msk söxuð fersk steinselja
- Salt, sítrónupipar og hvítlauksduft eftir smekk
- Finnsson hvítlaukssósa.
Aðferð
- Skerið kantana af brauðsneiðunum og fletjið út á báðum hliðum svo það verði þunnt og þétt í sér.
- Bræðið smjörið og hrærið pressaðan hvítlaukinn, steinseljuna og smá hvítlauksdufti saman við.
- Raðið humri á brauðið, um 2 bitar duga fyrir hvert brauð en að sjálfsögðu má setja meiri humar í hvern bita svo þetta er smekksatriði (ég var með 350 g af humri, setti 2 bita á hverja sneið og úr urðu 18 stykki).
- Kryddið humarinn með sítrónupipar og salti.
- Rúllið brauðinu þétt utan um humarinn og leggið hann til hliðar með samskeytin niður.
- Hellið smjörblöndunni á disk með uppháum köntum og veltið hverjum bita létt upp úr blöndunni (varist að bleyta bitana of mikið en þó þannig að þeir þekjist alveg.
- Raðið bitunum á ofnskúffu íklædda bökunarpappír og bakið í um 12-15 mínútur við 200°C eða þar til þeir gyllast og verða stökkir að utan.
- Best að taka bitana strax af smjörpappírnum og raða á pappír til að koma í veg fyrir þeir liggji og linist upp í smjörinu sem eftir situr.
- Berið fram með E. Finnsson hvítlaukssósu og salati.
