Bleik RUBY ostakaka

Bleik ostakaka með Odense RUBY súkkulaðidropum og Oreo kexbotni

Ostakökur eru æðislegar og ég fæ ekki nóg af því að prófa nýjar útfærslur af slíkum. Í grunninn er þetta yfirleitt svipuð blanda en svo er hægt að leika sér endalaust með bragð, áferð og hráefni.

Ég hef ekki mikið notað RUBY súkkulaði í gegnum tíðina en það er ótrúlega bragðgott og skemmtilegt hráefni og ekki skemmir bleiki liturinn fyrir og ég á án efa eftir að leika mér eitthvað meira með það í framtíðinni.

Bleik RUBY ostakaka

Botn

16 Oreo kexkökur
60 g brætt smjör

Myljið kexið niður í blandara þar til fín mylsna myndast og hrærið bræddu smjörinu saman við.
Setjið bökunarpappír í 20 cm smelluform, spreyið það næst að innan með matarolíuspreyi og þjappið kexmylsnunni í botninn og aðeins upp kantana.
Kælið á meðan annað er útbúið.

Ostakaka

260 g Odense Ruby súkkulaðidropar
3 gelatínblöð (+ 60 ml vatn)
500 g rjómaostur við stofuhita
150 g sykur
2 tsk. vanillusykur
250 ml þeyttur rjómi
Nokkrir dropar af bleikum matarlit (má sleppa)

Leggið gelatínblöðin í kalt vatn og leyfið að standa nokkrar mínútur.
Hitið þá 60 ml af vatni að suðu og setjið gelatínblöðin útí, eitt í einu og hrærið í á milli svo þau leysist upp. Hellið gelatínblöndunni í skál og leyfið að ná stofuhita á meðan annað er undirbúið.
Bræðið súkkulaðið og leggið til hliðar.
Þeytið saman rjómaost, sykur og vanillusykur í nokkrar mínútur.
Hellið þá gelatínblöndunni varlega saman við í mjórri bunu og því næst brædda súkkulaðinu, blandið rólega og skafið niður á milli.
Bætið matarlitnum saman við á þessu stigi sé þess óskað ef þið viljið enn skarpari bleikan tón.
Vefjið að lokum þeytta rjómanum saman við og hellið blöndunni yfir Oreo kexbotninn.
Kælið í að minnsta kosti 4 klukkustundir eða yfir nótt.

Skreyting

200 ml þeyttur rjómi
8 makkarónur
Oreomylsna

Sprautið rjómanum á kökuna með jöfnu millibili og stingið makkarónum á milli rjómatoppa.
Stráið Oreomylsnu yfir kökuna.

Ég elska súkkulaðidropana frá Odense og eru nokkrar nýjungar komnar og á leiðinni á markað frá þeim sem vert er að fylgjast með! Eins og er fást þessir dásamlegu dropar aðeins í Fjarðarkaup en eru á leiðinni í fleiri verslanir!