Um daginn tók ég út hakk úr frystinum og planið var að gera hakk og spaghetti í kvöldmat. Síðan rann dagurinn frá mér og ég hafði ekki komist í búð til að kaupa pastasósu né spaghetti og var ég næstum hætt við að nota hakkið. Ég ákvað að sjá hvað væri til í kotinu og viti menn, úr varð þessi undurljúffenga grýta sem kláraðist upp til agna!
Það tók enga stund að útbúa þennan rétt og hann verður klárlega gerður aftur á þessu heimili.
Hver þarf hakk og spaghetti þegar hann getur fengið grýtu!
Kósýgrýta
- 1 laukur
- 500 g nautahakk
- 100 g pastaslaufur
- 100 g fyllt ostapasta
- 5 msk. tómatsósa
- 400 ml rjómi
- 100 g pizzaostur
- 1 msk. oreganó
- Salt, pipar, paprikukrydd og hvítlaukskrydd eftir smekk
- Ólífuolía til steikingar
- Parmesan ostur yfir í lokin (má sleppa)
- Sjóðið báðar tegundir af pasta á meðan þið eldið hakkið sjálft.
- Saxið laukinn mjög smátt (þá fatta krakkar ekki það sé laukur í matnum).
- Steikið lauk og nautahakk upp úr ólífuolíu, kryddið eftir smekk.
- Hellið tómatsósu, rjóma og pizzaosti á pönnuna og hrærið vel þar til osturinn er bráðinn og rjómakennd sósa myndast, bætið oreganó á pönnuna og frekari kryddum eftir smekk.
- Sigtið pastað og bætið saman við.
- Þeir sem vilja geta síðan rifið parmesan ost yfir allt saman!
