Það er alltaf gaman þegar maður styttir sér leið í eldamennskunni og það heppnast glimrandi vel eins og í þetta skiptið! Það vilja allir fljótlegar uppskriftir og hér kemur ein frábær fyrir ykkur að prófa!
Lasagnette í ofni
Fyrir 4-5 manns
- 500 g nautahakk
- ½ laukur
- 3 hvítlauksrif (rifin)
- 150 g sveppir
- 200 g kúrbítur
- 1 pk Knorr Lasagnette Meal Kit
- 350 ml nýmjólk
- 600 ml vatn
- 1 dós Mozzarellakúlur litlar (180 g)
- Ólífuolía til steikingar
- Salt og pipar
- Hitið ofninn í 200°C og smyrjið eldfast mót að innan.
- Saxið laukinn niður og steikið upp úr ólífuolíu við meðalháan hita, kryddið eftir smekk þar til mýkist og bætið hvítlauknum á skamma stund áður en þið setjið hakkið saman við. Þá má hækka hitann og steikja og krydda hakkið þar til það er fullsteikt.
- Færið hakkið yfir á disk, bætið olíu á pönnuna og steikið niðurskorinn kúrbít og sveppi upp úr olíu þar til það mýkist, kryddið eftir smekk.
- Hellið hakkinu þá aftur yfir grænmetið, bætið vatni og mjólk á pönnuna og tómatblöndunni (duftinu) úr pokanum. Hrærið vel og náið upp suðunni, lækkið þá aftur hitann og leyfið að malla stutta stund þar til sósan þykknar aðeins.
- Hellið þá pastanu saman við og blandið létt. Hellið í eldfasta mótið og setjið í ofninn í 25 mínútur, bætið síðan mozzarella kúlunum ofan á og eldið í 5 mínútur til viðbótar.
- Njótið með góðu brauði.
Mmmm, mæli með!
