Marsípan er eitt það besta sem ég veit! Kransakökur, kransakökutoppar, kökur með marsípani og ég gæti líklega haldið endalaust áfram.
Kransakökutoppar eru afar einföld leið til þess að útbúa dýrindis mola úr marsípani. Sérlega ef maður kaupir það í umbúðum með stút framan á, þá er ekkert eftir nema sprauta, baka og skreyta, namm!
Ég sakna þess að sjá ekki kransakökubita í bakaríunum eins og í „gamla daga“ en það er lítið mál að útbúa þessa dásemd sjálfur, hvort sem það er fyrir veislu, jólahátíð eða bara fyrir sjálfan sig. Ég til dæmis bakaði slatta af toppum um daginn og á þá svo bara í frystinum til að næla mér í einn og einn mola þegar marsípanþörfin lætur á sér kræla eða þegar gesti ber að garði.
Odense marsípanið fæst í öllum helstu verslunum líkt og Bónus, Krónunni, Nettó, Fjarðarkaup og víðar.
Það er svo ótrúlega einfalt að útbúa kranaskökubita svo ef ykkur langar í eitthvað gott þá mæli ég með þessum hér. Það er til dæmis hægt að fylla þá með núggati eða setja kirsuber á toppinn, eða bara bæði! Einnig er mjög gott að dýfa botninum í dökkt súkkulaði því súkkulaði fer einstaklega vel með marsípaninu.
Kransakökubitar
Um 30 stk
- 2 x 400 g Odense Kransekage marsípan (tilbúið í poka)
- 150 g Odense Nougat
- 200 g Odense súkkulaðidropar
- Hitið ofninn 200°C.
- Klippið gat á endann á marsípanpokanum samkvæmt leiðbeiningum.
- Sprautið fast í góða „bústna“ toppa (varist að hafa þá of flata þegar sprautað er).
- Þjappið miðjunni niður með endanum á trésleif/öðru álíka til þess að búa til holu fyrir núggatið (það má einnig nota kokteilkirsuber í hluta en þá er það sett í holuna og bakað með toppunum).
- Bakið í 8-10 mínútur, fylgist vel með og takið út þegar rendurnar á toppunum fara að dökkna.
- Þjappið aftur ofan í holuna varlega með sleif þegar topparnir koma úr ofninum svo hægt sé að koma núggatinu vel fyrir síðar.
- Kælið og bræðið á meðan súkkulaðidropana.
- Stingið botninum á hverjum toppi í súkkulaðið, skafið aðeins af honum á kanti skálarinnar og leggið á bökunarpappír.
- Hitið núggatið í vatnsbaði þar til bráðið, setjið í sprautupoka og fyllið miðjuna á hverjum mola.
- Gott er að kæla bitana og þegar núggatið hefur þykknað að nýju eru þeir tilbúnir til þess að njóta þeirra.
Þetta er svo dásamlega gott og einfalt og þessir súkkulaðidropar eru guðdómlegir. Ríkt og sætt súkkulaðibragð í hverjum dropa, nammmm!
Núggat, marsípan og súkkulaði…..hvað er hægt að biðja um meira!
Það er erfitt að standast þessa mola.
Megið endilega fylgja Gotterí líka á INSTAGRAM
