Fyrir áramótin útbjó ég nokkrar einfaldar og girnilegar uppskriftir fyrir Hellmann’s í tilefni þess að nýjar „Street Food“ sósur voru að koma á markaðinn. Þetta eru algjörar snilldar sósur í hentugum umbúðum og ég byrja á að deila með ykkur uppskrift af naan vefjum með hvítlauks- og jalapeño majónesinu því það er mitt uppáhald.
Ég elska allt hægeldað og rifið svínakjöt eða nautakjöt passar ótrúlega vel í svona naan brauð, vefjur eða hamborgarabrauð og er ekta helgarmatur að mínu mati.
Naan vefjur uppskrift
Fyrir um 4 manns
Hægeldað nautakjöt aðferð
- 800 g nautakjöt (ribeye, lund eða annað)
- 150 ml Kikkoman soyasósa
- 150 ml ólífuolía
- 50 ml sesamolía
- 1 rautt, saxað chili
- 4 msk. púðursykur
- 2 rifin hvítlaukrif
- Steikið nautakjötið upp úr ólífuolíu við háan hita í stutta stund til að rétt brúna það á báðum hliðum.
- Blandið öllum öðrum hráefnum saman í skál á meðan og hellið yfir nautakjötið í pottinum.
- Leyfið suðunni að koma upp, lækkið vel niður og leyfið kjötinu að malla í 4-5 klukkustundir við lágan hita (2-3 klst á aðeins hærri hita duga alveg ef þið eruð á hraðferð).
- Takið þá bitana upp úr, rífið í sundur með gaffli og blandið sósu úr pottinum saman við eftir smekk áður en kjötið er sett í vefjuna.
Annað meðlæti
- 8-12 lítil naan brauð
- Gulrætur skornar í strimla
- Rauðkál skorið smátt niður
- Iceberg kál
- Kóríander
- Radísur (þunnt skornar)
- Hellmann‘s Garlic Jalapeño streetfood majónes
- Hitið/ristið naan brauðin.
- Setjið grænmeti í brauðið og því næst rifið nautakjöt.
- Að lokum má setja vel af Garlic majónesi yfir allt saman.
Þetta hvítlauks- og jalapeño majónes er algjör snilld og erum við fjölskyldan farin að nota það á ansi margt. Manninum mínum finnst það til dæmis geggjað yfir pizzur svo þetta er eitthvað sem þið verðið að prófa!
