Þessi kjúklingaréttur bjargaði svo sannarlega geðheilsunni hér á þessu heimili í gær! Það er svo gaman þegar tilraunastarfsemi heppnast vel og almáttugur hvað þessi réttur er góður! Ég setti hluta af honum í sér form fyrir litluna mína þar sem hún elskar ekki stóra bita af grænmeti í svona réttum og það var ekkert mál því öllu er raðað saman eftirá!
Ég rakst á hugmyndir af réttum á netinu þar sem snakk var sett á toppinn á ofnréttum og ákvað að gera mína útfærslu af kjúklingarétti með þessum hætti. Þetta kom virkilega vel út og ég þarf klárlega að prófa fleiri slíkar!
Kjúklingaréttur með kartöfluflögutoppi
- 5 x litlir Tilda hrísgrjónapokar, soðnir (um 300 g)
- 700 g Rose Poultry úrbeinuð kjúlingalæri (1 poki)
- 150 g sveppir
- ½ brokkolíhaus
- 1 laukur
- 2 x kjúklingasúpa í dós (2 x 295 g)
- 150 g Philadelphia rjómaostur
- 2 msk. fljótandi kjúklingakraftur frá Oscar
- Rifinn Cheddar ostur
- ½ poki Maarud snakk með salti og pipar
- Filippo Berio ólífuolía
- Salt, pipar og hvítlauksduft
- Hitið ofninn í 200°C.
- Sjóðið hrísgrjónin samkvæmt leiðbeiningum á pakka og undirbúið kjúkling, grænmeti og sósu á meðan.
- Skerið kjúklinginn í bita og steikið upp úr ólífuolíu, kryddið eftir smekk og leggið til hliðar á disk.
- Steikið þá, á sömu pönnu niðurskorið brokkolí upp úr vel af olíu, kryddið eftir smekk og hellið eins og 50 ml af vatni á pönnuna í lokin til að mýkja aðeins brokkolíið. Þegar vatnið hefur gufað upp má færa brokkolíið yfir á disk og steikja sveppi og lauk.
- Skerið sveppi og lauk niður, steikið upp úr ólífuolíu og kryddið eftir smekk, setjið á á diskinn með brokkolíinu.
- Næst má setja kjúklingasúpurnar, rjómaostinn og kraftinn á pönnunna og hræra vel þar til þykk sósa hefur myndast. Kryddið til eftir smekk.
- Raðið næst í eldfast mót; hrísgrjónin fara í botninn, því næst kjúklingabitarnir, svo grænmetið og þá má hella sósunni yfir allt saman.
- Stráið vel af rifnum osti yfir og toppið með Maarud snakki.
- Bakið í ofni í um 15 mínútur eða þar til osturinn er bráðinn og snakkið tekið að dökkna örlítið.
- Ef þið gerið þennan rétt með fyrirvara má plasta hann og setja í kæli en þá er gott að hita hann við 180°C í um 30 mínútur.
Þetta er auðvitað eitt uppáhalds snakkið okkar svo ég var ekki lengi að ákveða hvaða snakk yrði fyrir valinu í þessa tilraunastarfsemi.
