Það er ekta súpuveður þessa dagana svo ég ákvað að prófa að gera einhverja gómsæta súpu á dögunum. Ég gerði eiginlega bara eitthvað út í loftið og útkoman varð stórkostleg, matarmikil og ljúffeng grænmetissúpa sem sannarlega verður útbúin aftur síðar á þessu heimili.
Það gerir mikið fyrir súpuna að toppa hana með brauðteningum og öðru góðgæti!
Grænmetissúpa uppskrift
Fyrir 4-5 manns
- 1 sæt kartafla (500-600 g)
- 1 rauð paprika
- 1 gul paprika
- 4 gulrætur
- 1 rauðlaukur
- 2 hvítlaukar
- 5 msk. Filippo Berio ólífuolía
- 1200 ml vatn
- 3 msk. Oscar grænmetiskraftur
- 1 flaska Heinz chili sósa
- Salt, pipar, paprikuduft
- Sýrður rjómi
- Brauðteningar
- Ristuð graskersfræ
- Ólífuolía
- Hitið ofninn í 190°C.
- Flysjið og skerið kartöfluna niður í teninga.
- Skerið paprikur niður í strimla, gulrætur í þunnar sneiðar og laukinn í stóra bita.
- Blandið 5 msk. af ólífuolíu, 1 tsk. af salti, 1 tsk. af paprikudufti og ½ tsk. af pipar saman við grænmetið og setjið það í bökunarskúffu.
- Takið ofan af báðum hvítlaukunum til að opna geirana, penslið sárið með olíu og leggið ofan á grænmetið.
- Bakið í um 40 mínútur eða þar til grænmetið mýkist og snúið nokkrum sinnum á meðan.
- Útbúið á meðan soðið með því að setja vatn og grænmetiskraft í pott.
- Þegar grænmetið er tilbúið má kreista hvítlauksgeirana upp úr hvítlauknum og henda utan af þeim.
- Setjið síðan allt grænmetið í blandara og um helminginn af soðinu, maukið.
- Hellið síðan maukinu í pottinn með restinni af soðinu, náið upp hitanum, bætið chili sósunni saman við og kryddið eftir smekk.
- Berið fram með sýrðum rjóma, brauðteningum, smá ólífuolíu og ristuðum graskersfræjum.
Ég elska að nota þessa chili sósu í súpur!
Mmmm…..
Þessi færsla er unnin í samstarfi við Gerum daginn girnilegan
