Púðursykurmarengs eins og pabbi gerir hann er sá allra besti. Ég er oftast að vinna með að baka marengs við lægri hita í lengri tíma því þá verður hann stökkari og heldur sér betur. Pabbi bakar hins vegar við aðeins hærri hita í skemmri tíma og það kemur ákveðin karamellu-klísturs áferð inn í marengsinn sem er svoooo góð. Bæði er klárlega gott en gaman að gera mismunandi úrfærslur og ég var í stuði fyrir svona köku þetta skiptið svo hér kemur aðferðin hans pabba en með nýstárlegri fyllingu.
Namm!
Marengsterta sumarsins
Marengsbotnar
- 6 eggjahvítur
- 320 g púðursykur
- Hitið ofninn í 170°C.
- Setjið bökunarpappír á tvær ofnskúffur og teiknið um 25 cm hring á hvora.
- Þeytið saman eggjahvítur og púðursykur þar til topparnir halda sér.
- Skiptið á milli ofnplatanna og dreifið úr, skiljið eftir um 2 cm af hringjunum sem þið teiknuðu þar sem marengsinn lekur aðeins út við bakstur.
- Bakið í 45 mínútur og leyfið marengsinum að kólna niður með ofninum í að minnsta kosti klukkustund.
Fylling
- 600 ml þeyttur rjómi
- 500 g jarðarber
- 250 g Bíókropp með pipar-brjóstsykri
- 50 g Síríus suðusúkkulaði
- Takið um 1/3 af rjómanum til hliðar til að setja ofan á síðast.
- Stappið um helming jarðarberjanna og setjið saman við stærri hlutann af rjómanum (2/3), skerið restina af jarðarberjunum í bita til að skreyta kökuna með.
- Hellið 1 poka af Bíókroppi saman við rjómann með stöppuðu jarðarberjunum, blandið öllu vel saman og setjið á milli botnanna.
- Setjið restina af rjómanum á toppinn, smyrjið aðeins út (ekki alveg út að köntum samt) og skreytið með meira Bíókroppi og niðurskornum jarðarberjum.
- Bræðið að lokum suðusúkkulaðið og dreifið úr yfir alla kökuna.
Ef þið hafið ekki smakkað þessa útgáfu af Bíókroppinu þá eruð þið að missa af!
