Eitt síðdegið í síðustu viku skelltum við mæðgur í þetta fína hollustubrauð. Við útbjuggum síðan safa í safapressunni og þetta varð að hollum og góðum kvöldverði þann daginn. Brauðið var ýmist borðað með smjöri og osti eða kotasælu og papriku/gúrku eftir því hvað hver vildi.
Speltbrauð á nokkrum mínútum uppskrift
- 300 ml mjólk
- 4 msk sítrónusafi
- 370 gr spelthveiti
- 90 gr haframjöl (gróft)
- 2 tsk matarsódi
- 1 ½ tsk salt
- 150 gr blönduð fræ
- Hitið ofninn 200°C
- Blandið sítrónusafa saman við mjólkina og leyfið að standa í um 5 mínútur.
- Blandið öllum þurrefnunum saman í hrærivélarskálina og notið krókinn.
- Hellið mjólkurblöndunni saman við og blandið vel og því næst fræjunum.
- Spreyið brauðform með PAM og hellið deiginu í formið, stráið fræjum yfir áður en bakað.
- Bakið í um 25 mínútur eða þar til kantarnir verða aðeins gylltir.
