Bananasplitt þarf vart að kynna til sögunnar því það er auðvitað algjör klassík sem hittir alltaf í mark! Það er hins vegar vel hægt að gera risa bananasplitt fyrir allan hópinn og dóttur minni fannst í það minnsta skemmtilegt að raða þessu saman og svo naut öll fjölskyldan í framhaldinu!
Partý bananasplitt
- 1 ½ dós Häagen-Dazs ís með jarðarberjum (600 g)
- 1 ½ dós Häagen-Dazs ís með saltri karamellu (600 g)
- 2-3 bananar
- 100 ml þeyttur rjómi
- Nokkur niðursoðin kirsuber
- Súkkulaði íssósa
- Jarðarberja íssósa
- Kökuskraut
- Hnetukurl
- Byrjið á því að setja fatið/diskinn sem skal nota í verkið í frystinn í um klukkustund áður en þið hefjist handa. Með því móti bráðnar ísinn síður á meðan þið eruð að útbúa réttinn.
- Áður en þið byrjið að setja bananasplittið saman er gott að hafa þeyttan rjóma tilbúinn í sprautupoka eða nota rjóma úr rjómasprautu.
- Skerið bananana niður í bita og hafið íssósur, kirsuber, kökuskraut og hnetukurl tilbúið.
- Búið síðan til kúlur úr ísnum (gott að setja ísskeiðina í heitt vatn á milli til að auðvelda kúlugerð) og raðið þeim í pýramída á fatið/diskinn sem var í frystinum.
- Gott er að setja bananabita líka inn á milli og síðan þegar þið eruð komin með fallega ískúluhrúgu má setja íssósur, rjóma, kökuskraut, hnetukurl og kirsuber til skrauts.
- Berið fram samstundis.
Hér erum við með tvær uppáhalds ístegundir fjölskyldunnar, sú yngsta vill karamelluísinn í öll mál og pabbinn og elsta slást um jarðarberjaísinn, hahahaha! Ég og miðjan erum bara til í smá af hvortveggja!
