Dóttir vinafólks okkar átti afmæli á dögunum og var Ponyþema. Þar sem „öldumynstur“ er eitt af mínum uppáhalds ákvað ég að útbúa eina slíka marglita og koma tveimur Pony vinum fyrir á toppnum.
Innihaldið er súkkulaðikaka, Betty Crocker Devils mix, bökuð í 2 x 20 cm formum og svo hvor botn um sig tekinn í tvennt með skera. Súkkulaðikremi smurt á milli og svo skreytt með vanillu smjörkremi. Fyrst þunnu lagi yfir alla kökuna og því næst er munstrinu sprautað á með hringlaga stút sem er rúmur 1 cm í þvermál.
Kaka
- 1 x Betty Crocker Devils Food cake mix, bakað í 2 x 20cm formum
Súkkulaðismjörkrem á milli laga (3 x kremlag)
- 125gr smjör (mjúkt)
- 500gr flórsykur
- 1 egg
- 2 tsk vanilludropar
- 2 msk sýróp
- 4msk bökunarkakó
- Setjið öll hráefnin nema flórsykur og kakó í hrærivélarskálina og hrærið vel saman.
- Blandið flórsykri og kakó saman og bætið varlega útí blönduna, skafið niður á milli og hrærið þar til kremið er slétt og fellt.
Vanillusmjörkrem til að skreyta kökuna að utan (gera 1,5 – 2x þessa uppskrift)
• 125gr smjör (mjúkt)
• 500gr flórsykur
• 1 egg
• 2 tsk vanilludropar
• 2 msk sýróp
- Setjið öll hráefnin nema flórsykur í hrærivélarskálina og hrærið vel saman.
- Bætið flórsykri varlega útí blönduna, skafið niður á milli og hrærið þar til kremið er slétt og fellt.
- Litið með þeim matarlit sem þið óskið eftir og byrjið á því að hjúpa alla kökuna með þunnu lagi af kremi.
- Sprautið „doppur“ lóðrétt eftir hlið kökunnar og dragið úr hverjum lit með spaða, endurtakið með smá fjarlægð á milli þar til þið eruð komin hringinn.
