Hér er á ferðinni ekta pizza fyrir rómantískan kvöldverð! Auðvitað má gera þessa pizzu við hvaða tilefni sem er en mér fannst þetta eitthvað svo ekta þannig stemming í henni. Almáttugur hvað perur, brie og karamelluhnetur eru fullkomin blanda og þið hreinlega verðið að prófa þessa snilld!
Pizza fyrir tvo
- 50 g pekanhnetur
- 50 g sykur
- 20 g smjör
- 1 x gott pizzadeig að eigin vali
- 5 msk. ricotta ostur
- 2 litlar perur
- ¾ brie ostur
- 4-5 hráskinkusneiðar
- Filippo Berio balsamik gljái
- Ferskt timian
- Ólífuolía
- Salt, pipar, hvítlauksduft
- Byrjið á því að útbúa karamelluhnetur með því að saxa pekanhneturnar niður og bræða næst sykurinn á pönnu. Setjið smjörið síðan á pönnuna áður en sykurinn fer að brenna, hrærið vel saman, lækkið hitann og blandið pekanhnetunum saman við. Leyfið hnetunum að drekka aðeins í sig karamelluna og hrærið vel. Dreifið síðan úr hnetublöndunni á bökunarpappír og leyfið að storkna á meðan pizzan er undirbúin.
- Hitið ofninn í 220°C og mótið pizzu sem fyllir nánast út í eina bökunarplötu.
- Smyrjið ricotta osti yfir botninn og skerið perur og brie ost í sneiðar og raðið yfir pizzuna.
- Penslið með smá ólífuolíu og kryddið eftir smekk.
- Bakið í 17-20 mínútur eða þar til botninn fer að gyllast vel og pizzan er tilbúin.
- Toppið með hráskinku, karamelluhnetum, balsamik gljáa og smá fersku timian.
Þessi balsamik gljái gerir síðan gott betra! Ég sá svipaða hugmynd hjá The Original Dish á Instagram og varð að prófa að gera mína útfærslu af svona dásemd.
Rauðvín passar einstaklega vel með þessari pizzu!
Þessi færsla er unnin í samstarfi við Gerum daginn girnilegan!
