Þessi veisluréttur er búinn að vera allt of lengi hingað inn á bloggið til að deila með ykkur. Berglind æskuvinkona mín hefur boðið upp á þennan rétt í sínum veislum, við gert hann ótal oft og nú kemur hann hingað inn fyrir ykkur að prófa. Þessi var einn af fáum sem ég hafði sett hingað á bloggið sem fékk pláss í bókinni minni, Saumaklúbburinn því í henni eru ótal nostalgíuuppskriftir og þessa mátti ekki vanta! Við Berglind höfum verið vinkonur síðan við vorum 5 ára, við bjuggum garð í garð og eigum báðar mömmu sem heitir Elín og það þótti sko frekar kúl þegar við vorum litlar.
Ég hef aðeins breytt uppskriftinni frá því hún sendi mér hana, bæði til að einfalda hana og til að minnka aðeins paprikumagnið. Hér fyrir neðan sjáið þið hana þó upprunalega einnig svo ykkar er valið.
Karrýgrjón með sinnepssósu uppskrift
Grjónin
• 2 pk kryddhrísgrjón með kjúklingabragði (í litlum bláum pokum 2 x 90 g)
• 1 ½ rauð sæt paprika
• 150 g maísbaunir
• 2 msk karrý
• 1 msk aromat
• 1 msk hvítlauksduft
• 170 g Hellmann’s majónes
• 70 g sýrður rjómi
1. Sjóðið hrísgrjónin og leggið þau til hliðar, gott að leyfa þeim að ná stofuhita.
2. Saxið paprikuna smátt niður og blandið saman við grjónin ásamt gulu baununum.
3. Setjið karrý, aromat og hvítlauksduft saman við ásamt majónesi og sýrðum rjóma.
4. Hrærið þar til allt er vel blandað og nægilega blautt til að grjónin haldist saman (bætið við majónesi eftir smekk).
5. Setjið hrísgrjónablöndu á ristað brauð/baguette og vel af sinnepssósu yfir og njótið.
Sinnepssósa
• 100 g Hellmann’s majónes
• 100 gsýrður rjómi
• 60 g hunang
• 50 g sætt sinnep
• 1 msk karrý
• 1 msk aromat
1. Hrærið öllu saman með písk þar til kekkjalaust og berið fram með hrísgrjónablöndu á ristuðu brauði.
Mmmm…. þetta er svo gott og passar fullkomlega í veisluna eða með helgarkaffinu eins og hjá okkur í gær. Hemmi og Árni nágranni voru úti að mála húsið og fannst þeim ekkert sérstaklega leiðinlegt að fá þessa sendingu út á pall. Rétturinn dreifði sér einnig til fleiri nágranna (sem lánuðu gular baunir fyrir hádegi á sunnudegi til að redda þessu) og sló hann einnig í gegn þar svo þessi fær klárlega góða einkunn!
Hér fyrir ofan sjáið þið síðan upprunalegu uppskriftina frá Berglindi vinkonu.
