Jólabrauðterta

Brauðtertur eru sívinsælar og senn líður að jólum. Þessi hér er jólaleg og falleg og myndi sóma sér í hvaða veislu/boði sem er.

Ég var smá stressuð að setja trönuber út í skinkusalatið og smakkaði þetta fram og tilbaka áður en ég lét slag standa. Sætan úr þeim passar fullkomlega á móti reykta bragðinu af skinkunni. Þeir sem smökkuðu þessa voru á einu máli um að hún væri alveg svakalega góð.

Það var síðan svoooo gaman að skreyta hana og bera hana fram því hún er sannarlega jólin uppmáluð.

Jólabrauðterta

450 g hamborgarhryggur (eða önnur reykt skinka)
8 harðsoðin egg
400 g Hellmann‘s majónes
60 g þurrkuð trönuber
2 msk. smátt saxað sellerí
Aromat og pipar eftir smekk
5 brauðtertubrauðsneiðar (langar)

Skraut

400 g Hellmann‘s majónes
Um 500 g fersk trönuber (2 pokar)
Um 4 pakkar rósmarín (4 x 28 g)
Brómber
Þunnt skorinn hamborgarhryggur

Skerið hamborgarhrygginn í sneiðar og síðan í litla bita (það má hálfpartinn saxa hann).
Skerið eggin á tvo vegu með eggjaskera og setjið saman við skinkuna.
Blandið majónesinu saman við á þessu stigi og saxið þá trönuberin og selleríið mjög smátt og bætið saman við.
Kryddið eftir smekk og skiptið í 4 hluta.
Skerið skorpuna af brauðtertubrauðinu og smyrjið salatinu á milli sneiðanna.
Þekjið brauðtertuna að utan með majónesi og skreytið að vild.

Brauðterta með hamborgarhrygg og trönuberjum

Væri ekki gaman að koma með þessa dásemd í næsta boð?

Þessi var svoooo góð að meira að segja elsku gamli hundurinn okkar hann Brúnó vildi greinilega mikið fá bita. Ég ákvað að setja poka yfir hana og geyma hana úti þar sem langa brettið passaði ekki í ísskápinn. Dætur mínar hleyptu honum út í garð á meðan ég skaust aðeins frá og þegar ég kom heim stóð minn maður úti og hámaði í sig þessa dásemd! Ég vissi ekki hvort ég ætti að hlægja eða grenja og hann vissi sko alveg upp á sig skömmina og faldi sig inn í bílskúr, hahaha. Þetta verður mér í það minnsta lexía að passa betur upp á að setja veitingar sem geyma á úti ofar en í hundshæð í framtíðinni, híhí!