Þessi kartöflumús er eitt það besta sem við fáum. Uppskriftin hefur fylgt okkur síðan við bjuggum í Seattle en þar fylgdi hún Þakkargjörðarkalkúninum og nú ýmist honum eða hátíðarkalkúninum okkar hér á Íslandi. Máney vinkona gaf mér uppskriftina á sínum tíma og ég fæ bara vatn í munninn við að skrifa þessa færslu, þetta er sú allra besta „mús“ sem þið getið fengið!

Mér finnst „kröstið“ ofan á svo gott að ég geri stundum tvöfalda uppskrift af því og set músina í tvö grunn eldföst mót til að fá meira af henni með í hverjum bita.

Sætkartöflumús uppskrift

5 stk. sætar kartöflur
½ tsk. salt
3 msk. smjör við stofuhita
2 egg (pískuð)
1 tsk. vanilludropar
½ tsk. kanill
100 g sykur
2 msk. rjómi

Kröst ofan á

60 g hveiti
60 g smjör við stofuhita
40 g púðursykur
20 g hvítur sykur
50 g saxaðar pekanhnetur

Skrælið kartöflurnar og skerið í nokkra bita, sjóðið þar til bitarnir mýkjast.
Setjið kartöflubitana í hrærivélarskál ásamt öllum öðrum hráefnum og blandið saman og hellið í eldfast mót.
Útbúið kröstið með því að hræra saman öllum hráefnunum nema pekanhnetum. Stráið deiginu jafnt yfir kartöflumúsina og einnig pekanhnetunum.
Bakið í ofni við 180°C í um 20 mínútur eða þar til kröstið fer aðeins að gyllast.