Andabringur með rauðvínssósu

Ég var að prófa að elda andabringur í fyrsta skipti og það lukkaðist svona líka vel! Já krakkar mínir, það er eitt og annað sem maður á eftir að prófa í eldhúsinu og það get ég sagt ykkur að þetta er sannarlega ekki í síðasta skipti sem andabringur verða hér á boðstólnum, namm!

Andabringur og kartöflumús með rauðvínssósu

Ég mæli með því að byrja á því að græja grunninn fyrir sósuna og leyfa því að malla á meðan allt annað er undirbúið. Einnig þarf að koma kartöflunum í suðu og marinera sveppina áður en byrjað er á bringunum til þess að þetta smelli allt saman á réttum tíma.

HÉR finnið þið Reels myndband af þessum uppskriftum!

Fyrir 3-4 manns

Andabringur uppskrift

2 x Valette andabringur
Salt og pipar

Leyfið andabringunum að ná stofuhita áður en þið eldið þær.
Hitið ofninn í 160°C.
Skerið tígla í fituna án þess að fara í gegn í kjötið og nuddið grófu salti í hana alla.
Steikið á fremur háum hita í 4-5 mínútur með fituhliðina niður, takið alla umfram fitu jafnóðum af pönnunni svo fituhliðin verði stökk.
Steikið síðan í um 2-3 mínútur á hinni hliðinni, saltið og piprið báðar hliðar eftir smekk.
Færið í ofninn í um 15 mínútur til viðbótar eða þar til kjarnhiti nær 60°C.
Leyfið bringunum að standa í að minnsta kosti 10-15 mínútur áður en þið skerið þær niður í þunnar sneiðar.

Rauðvínssósa uppskrift

30 g smjör
1 laukur
2 meðalstórar gulrætur
2 hvítlauksrif
350 ml Muga rauðvín
400 ml vatn
2 msk. fljótandi Oscar nautakraftur
1 msk. soyasósa
2 lárviðarlauf
3 negulnaglar
1 anísstjarna
1 tsk. salt
½ tsk. pipar
2-3 msk. Maizenamjöl

Skerið lauk og gulrætur gróft niður og steikið upp úr smjörinu ásamt hvítlauknum. Leyfið að malla í nokkrar mínútur eða þar til grænmetið mýkist.
Hækkið þá aftur hitann, hellið rauðvíninu í pottinn, náið upp suðunni og leyfið því að sjóða niður í nokkrar mínútur á meðalháum hita.
Þá má setja öll önnur hráefni í pottinn (nema Maizenamjöl) og hækka aðeins undir aftur til að ná upp suðunni að nýju, lækka síðan vel niður og leyfa að malla í að minnsta kosti 30 mínútur, lengur ef þið hafið tíma.
Sigtið þá allt gumsið frá, hellið sósunni aftur í pottinn, náið upp hitanum að nýju og þykkið eftir smekk með Maizenamjöli. Sósan má síðan alveg hvíla við mjög lágan hita á meðan þið klárið aðra eldamennsku.

Kartöflumús uppskrift

Um 1,2 kg kartöflur
30 g smjör
300 ml nýmjólk
1 msk. sykur
½ tsk. salt
30 g rifinn parmesan ostur

Skrælið kartöflurnar og sjóðið þar til þær verða mjúkar og hellið þá vatninu af þeim.
Setjið öll önnur hráefni í pottinn og stappið saman með kartöflustöppu, eða setjið allt saman í hrærivélarskálina og blandið vel saman.

Marineraðir sveppir

Um 300 g kastaníusveppir
4 msk. Filippo Berio ólífuolía
2 msk. Filippo Berio balsamikgljái
2 msk. soyasósa
2 msk. púðursykur
2 rifin hvítlauksrif
1 tsk. saxað timian

Hitið ofninn í 200°C.
Blandið öllum hráefnum saman í skál fyrir utan sveppina.
Veltið sveppunum næst upp úr blöndunni, setjið í eldfast mót og bakið í ofninum í 40 mínútur.
Gott er að velta sveppunum upp úr marineringunni nokkrum sinnum á meðan þeir eru í ofninum.

Valette andabringurnar fást í Hagkaup og Fjarðarkaup.

Auðvitað notum við síðan uppáhalds rauðvínið með þessari dásemd. Vá hvað ég hlakka til að prófa fleiri uppskriftir með önd á næstunni, heill nýr heimur að opnast hér í eldhúsinu skal ég segja ykkur, hahaha!