Það er fátt betra en grilluð rif sem losna auðveldlega af beinunum. Á þessu heimili elskar öll fjölskyldan rif og því eru eldaðir stórir skammtar í hvert sinn svo allir fái nægju sína, hahaha!
Hér fyrir ofan má sjá myndband sem við gerðum fyrir Gerum daginn girnilegan á dögunum.
Það er mjög auðvelt að elda sjálfur rif frá grunni en best þykir mér að nota ráðið frá Stefáni vini mínum en það er að hægelda þau í steikarpoka og síðan pensla með BBQ sósu og skella á grillið. Það er aðferð sem er einföld og getur ekki klikkað.
BabyBack rif og kartöflusalat
Fyrir um 4 manns
BabyBack rif
- 4 x heil óelduð BabyBack rif
- Steikarkrydd
- 2 x steikarpoki
- Bull‘s Eye Original BBQ sósa
- Hitið ofninn 150°C.
- Kryddið rifin vel beggja megin og komið þeim fyrir í steikarpoka, 2 rif í hvorn poka.
- Hægeldið rifin í pokunum í 1,5 klst, takið þau þá út, opnið pokann og leyfið hitanum aðeins að rjúka úr.
- Penslið örþunnu lagi af BBQ sósu á rifin beggja megin og grillið á vel heitu grilli skamma stund (þetta gert til þess að fá stökka húð á kjötið).
- Takið af grillinu og penslið 2 x BBQ sósu á báðar hliðar að nýju, skerið niður, stráið smá sesamfræjum yfir til skrauts og berið fram.
Kartöflusalat uppskrift
- 650 g soðnar kartöflur
- 4 harðsoðin egg
- ½ rauðlaukur smátt saxaður
- 1 stöng sellerí smátt saxað
- 1 msk. kóríander saxað
- 200 g Heinz majónes
- 2 msk. Heinz sætt sinnep
- 1 msk. sítrónusafi
- 1 tsk. salt
- ½ tsk. pipar
- Skerið kartöflur og egg í 4 hluta.
- Blandið majónesi, sinnepi, sítrónusafa og kryddum saman í skál þar til kekkjalaust.
- Blandið þá öllum hráefnunum varlega saman með sleif og geymið í kæli fram að notkun.
Nú er ekkert annað í stöðunni en að skella þessari snilld á grillið!
