Mamma og pabbi eru með risastóran rabarbaragarð hjá sér og hjóluðu systurnar uppeftir til þeirra í dag og komu heim með fullan poka af rabarbara. Það var því ekkert annað í stöðunni en að skella í eitt rabarbarapæ! Þessi uppskrift er mjög einföld og alveg æðislega góð!
Mmmm, svo einfalt og ljúffengt!
Rabarbarapæ með karamellusúkkulaði
- 400 g rabarbari
- 20 g sykur
- 150 g Síríus rjómasúkkulaði með karamellukurli og sjávarsalti
- 3 msk. kókosflögur
- 140 g hveiti
- 140 g púðursykur
- 140 g smjör (við stofuhita)
- 70 g haframjöl
- Hitið ofninn í 170°C.
- Skerið rabarbarann niður í þunnar sneiðar og dreifið um eldfast mót.
- Saxið súkkulaðið gróft niður og stráið sykrinum, súkkulaðinu og kókosflögum yfir rabarbarann.
- Blandið þá hveiti, púðursykri, smjöri og haframjöli saman í hrærivélarskálinni þar til smjörið hefur náð að bindast öðrum hráefnum og dreifið því vel yfir allt saman.
- Bakið í um 35 mínútur eða þar til toppurinn fer aðeins að gyllast og súkkulaðið að bubbla upp úr á köntunum.
- Njótið með þeyttum rjóma eða ís.
Súkkulaði gerir auðvitað allt pæ betra og Síríus rjómasúkkulaði með karamellukurli fór einstaklega vel með rabarbaranum.
