Hér er á ferðinni brjálæðislega góð hvít súkkulaðimús í lögum með hafrakexi og bananakaramellu!
Þetta er án efa með betri eftirréttum sem ég hef prófað og þessi karamella! Hún er alveg dásamleg.
Hvít súkkulaðimús með bananakaramellu uppskrift
- 250 g Lu Digestive Classic hafrakex
- 400 g hvítt Toblerone
- 100 g smjör
- 1 poki (220 g) Dumle karamellur með bananabragði
- 3 msk rjómi (fyrir karamellu)
- 650 ml rjómi (fyrir súkkulaðimús)
- 50 g sykur
- 4 egg
- Myljið hafrakex í blandara/matvinnsluvél og geymið til hliðar.
- Saxið Toblerone gróft og hitið með smjöri í vatnsbaði þar til bráðið. Takið þá af hitanum og leyfið hitaðum að rjúka aðeins úr en hrærið reglulega í á meðan.
- Bræðið Dumle karamellur og rjóma (3 msk) saman í litlum potti þar til bráðið og takið af hellunni og leyfið að kólna aðeins og þykkna.
- Þeytið rjómann (650 ml) og geymið.
- Þeytið nú egg og sykur þar til létt og ljóst og hellið súkkulaðiblöndunni varlega saman við og hrærið saman á lægstu stillingu.
- Vefjið þá um ¼ af þeytta rjómanum saman við og þegar það hefur blandast vel má vefja restinni af rjómanum saman við í tveimur skömmtum.
- Að lokum er komið að því að setja súkkulaðimúsina í glös/krúsir: Fyrst fer um 1 msk af kexmylsnu, því næst súkkulaðimús og að lokum um matskeið af karamellu. Mér finnst gott að setja súkkulaðimúsina í stóran sprautupoka og koma henni þannig fyrir í glasinu og hella síðan karamellunni yfir. Það má endurtaka ferlið fyrir stærri ílát eða láta eina umferð duga fyrir þau minni. Ég setti í tvær tegundir af krúsum til þess að þið gætuð séð hvernig hvort um sig kæmi út.
- Gott er að kæla músina í að minnsta kosti tvær klukkustundir áður en hún er borin fram. Hana má einnig útbúa deginum áður og kæla yfir nótt.
- Uppskriftin gefur um 10-12 krúsir/glös (fer eftir stærð).
Það má að sjálfsögðu gera meira af karamellunni og geyma í krukku til þess að nota sem íssósu eða fyrir annað góðgæti.
Megið endilega fylgja Gotterí á Instagram með því að smella hér
