Hér kemur enn ein klassíkin frá mér fyrir þessar hátíðirnar! Það er nefnilega þannig að margir vilja halda í hefðir og bjóða upp á klassískan mat á helstu hátíðsdögum og því finnst mér mikilvægt að hafa slíkar uppskriftir hér á vefnum í bland við aðrar nýstárlegar.
Þessi uppskrift er afar einföld og hana ættu allir að ráða við að gera. Best finnst mér að gera hana deginum áður og geyma í kæli, sigta síðan kakóið yfir rétt áður en rétturinn er borinn fram.
Uppskriftin birtist í blaðinu Hátíðarmatur í Morgunblaðinu á dögunum.
Tiramisu uppskrift
Uppskrift dugar í 5-7 glös (eftir stærð)
- 4 eggjarauður
- 140 g flórsykur
- 500 g Mascarpone rjómaostur við stofuhita
- Fræ úr einni vanillustöng
- 190 ml þeyttur rjómi
- 230 ml sterkt uppáhellt Java Mokka kaffi frá Te&kaffi (kælt)
- 4 msk. Galliano Ristretto strong espresso líkjör
- Um 2 pk. Lady fingers kex (hver pakki 125 g)
- Bökunarkakó til skrauts
- Þeytið saman eggjarauður og flórsykur þar til létt og þykk blanda myndast (um 5 mín).
- Bætið þá Mascarpone osti og fræum úr vanillustöng saman við og þeytið vel áfram þar til vel blandað og vefjið næst þeytta rjómanum saman við með sleif.
- Hellið kaffi og Galliano Ristretto saman í djúpan disk sem auðvelt er að dýfa kexinu í.
- Dýfið Lady fingers kexi snöggt upp úr vökvanum á báðum hliðum og raðið í botninn á glösunum, brjótið niður eftir hentugleika (passið ykkur að gegnbleyta þá ekki því þá verða þeir linir og slepjulegir).
- Gott er að setja eggjablönduna í sprautupoka og sprauta yfir kexið áður en næsta lag er sett ofan á með sambærilegum hætti.
- Plastið og kælið í að minnsta kosti 4 klukkustundir (eða yfir nótt).
- Setjið að lokum bökunarkakó í sigti og stráið yfir glösin.
Mmmm þetta er svo góður eftirréttur og verður hann klárlega á boðstólnum á þessu heimili yfir hátíðarnar.
Nammi nammi namm!
Mæli sannarlega með því að þið prófið þessa dásemd.
