Oreo bollur

Bollugleðin heldur áfram hjá mér og hér kemur ein sem er algjört DÚNDUR!

Súkkulaðirjómi með súkkulaði og Oreo Crumbs og mjúkur súkkulaðiglassúr, namm! Þessar birtust í bollubæklingi Hagkaups þetta árið og getið þið séð hann hér fyrir neðan.

Mikið af dásamlegum bollum frá frábærum bloggurum er að finna í bæklingnum!

Vatnsdeigsbollur með Oreo uppskrift

15-18 stykki

180 g smjör
360 ml vatn
200 g hveiti
1 tsk. lyftiduft
¼ tsk. salt
3-4 egg (160 g)

Hitið ofninn í 180°C.
Hrærið saman hveiti, lyftidufti og salti í skál og geymið.
Hitið saman vatn og smjör í potti þar til smjörið er bráðið og blandan vel heit og takið þá af hellunni.
Hellið hveitiblöndunni saman við smjörblönduna og hrærið/vefjið saman við með sleif þar til allir kekkir eru horfnir og blandan losnar auðveldlega frá köntum pottsins.
Flytjið blönduna yfir í hrærivélarskálina og hrærið á lægsta hraða með K-inu og leyfið hitanum þannig að rjúka aðeins úr blöndunni.
Pískið eggin saman í skál og setjið þau saman við í litlum skömmtum og skafið niður á milli. Best er að vigta blönduna því egg eru misstór og nota aðeins 160 g henni til þess að deigið verði ekki of þunnt.
Setjið bökunarpappír á ofnplötur og hver bolla má vera um 2 matskeiðar af deigi (ein vel kúpt matskeið).
Bakið í 27-30 mínútur, bollurnar eiga að vera orðnar vel gylltar og botninn líka, ekki opna þó ofninn fyrr en í fyrsta lagi eftir 25 mínútur til að kíkja undir eina. Helstu mistök sem fólk gerir er að baka bollurnar ekki nógu lengi og þá geta þær fallið.

Fylling

600 ml rjómi
2 msk. Cadbury bökunarkakó
120 g saxað Milka Oreo súkkulaði

Þeytið rjóma og bökunarkakó saman.
Vefjið Milka Oreo súkkulaði saman við súkkulaðirjómann og setjið á bollurnar.

Súkkulaðiglassúr og skraut

110 g brætt smjör
210 g flórsykur
2 msk. Cadbury bökunarkakó
2 tsk. vanilludropar
Oreo Crumbs með kremi
250 ml þeyttur rjómi
Lítil Oreokex (15-18 stykki)

Hrærið saman brætt smjör, flórsykur, bökunarkakó og vanilludropa þar til slétt og falleg súkkulaðibráð hefur myndast.
Smyrjið á bollurnar og skreytið með Oreo Crumbs.
Þeytið rjómann, setjið í sprautupoka og sprautið smá rjóma á hverja bollu og stingið litlu Oreokexi ofan í rjómatoppinn.

Elska að skreyta kökur, bollakökur og eftirrétti með svona litlu krúttlegu Oreo kexi. Síðan finnst stelpunum mínum þetta æði og gott að grípa með í ferðalög og sparinesti því það er svo auðvelt að loka boxinu aftur.