Fiskibollur og karrýsósa

Stelpurnar mínar elska alla rétti sem innihalda karrý! Kjúkling í karrý, kjöt í karrý og auðvitað fiskibollur í karrý!

Amma Guðrún gerði alltaf æðislegar fiskibollur handa okkur frá grunni en ég hreinlega hef ekki gefið mér tíma til þess að útbúa slíkar og þá er frábært að geta gripið í tilbúnar Gríms fiskibollur. Þær eru svakalega góðar og einfalda eldamennskuna klárlega til muna.

Karrýsósu er lítið mál að útbúa sjálfur og hér fyrir neðan getið þið smellt á textann og kíkt á stutt myndband á Instagram til að sjá hversu einfalt þetta er.

Fiskibollur og karrýsósa – Reels myndband á Instagram

Fyrir um 4-5 manns

Fiskibollur

2 pakkar af Gríms fiskibollum
50 g smjör

Steikið bollurnar upp úr smjöri við miðlungshita þar til þær verða aðeins stökkar að utan og vel heitar í gegn.

Karrýsósa uppskrift

1 laukur (smátt saxaður)
50 g smjör
2 msk. karrý
350 ml vatn
450 ml rjómi
2-3 msk. kraftur (ég nota oftast nauta)
50 g Maizenamjöl
Salt og pipar eftir smekk

Steikið laukinn upp úr smjöri þar til hann fer að mýkjast.
Bætið þá karrý á pönnuna og steikið aðeins áfram, saltið og piprið eftir smekk.
Hellið vatni og krafti næst á pönnuna og leyfið aðeins að malla.
Því næst fer rjóminn á pönnuna og hitið að suðu, bætið Maizenamjölinu saman við og hrærið vel, lækkið hitann.
Leyfið sósunni aðeins að malla og kryddið til með salti og pipar (og meiri krafti) eftir smekk.