Hafrasmákökur eru eitt það allra besta! Ég hef gert ótal útfærslur af slíkum og hér kemur ein dásamleg með súkkulaði sem ég færði úr köku yfir í stykki.
Þegar við fórum norður í afmæli hjá mági mínum um daginn keypti ég mér hafrastykki með súkkulaði á N1 á Blönduósi. Það gaf mér hugmyndina að þessari færslu og nú er hún komin hingað inn fyrir ykkur að elska!
Hafrastykki með súkkulaði
16 stykki
- 120 g brætt smjör
- 80 g sykur
- 70 g púðursykur
- 1 egg
- 2 tsk. vanilludropar
- 100 g Til hamingju tröllahafrar
- 150 g hveiti
- 1 tsk. matarsódi
- ½ tsk. salt
- 100 g súkkulaðidropar
- Hitið ofninn í 175°C og klæðið ferkantað kökuform (20 x 20 cm) að innan með bökunarpappír og spreyið með matarolíuspreyi.
- Hrærið smjör og báðar tegundir af sykri saman.
- Bætið eggi og vanilludropum saman við og blandið saman.
- Setjið næst tröllahafra, hveiti, matarsóda og salt í skálina og hrærið stutta stund.
- Skafið niður með sleikju og blandið að lokum súkkulaðidropunum saman við með sleikjunni.
- Hellið blöndunni í formið og sléttið úr.
- Bakið í um 25 mínútur eða þar til kantarnir fara að gyllast.
- Kælið og skerið síðan í bita.
Þessi uppskrift birtist síðustu helgi í Fréttablaðinu en þar var ég með fleiri nestishugmyndir fyrir haustið.
