Þrátt fyrir að veðrið þessa dagana minni fremur á haust en sumar víða á landinu má alltaf elda sumarlegan mat og fá með því sól í hjarta!
Þessi réttur er sannarlega einn af þeim og þessi rif eru þau allra bestu!
BBQ Chilli svínarif með sumarsalsa
Fyrir 4-6 manns
Svínarif uppskrift
- 4 x heil óelduð svínarif
- Steikarkrydd
- 1 x stór steikarpoki (t.d kalkúna)
- Heinz BBQ chilli sósa
- Hitið ofninn 150°C.
- Kryddið rifin vel beggja megin (ég notaði salt, pipar, papriku og Bezt á allt krydd í bland).
- Komið þeim fyrir í steikarpoka og lokið vel.
- Hægeldið rifin í pokunum í 1,5 klst, takið þau þá út, opnið pokann og leyfið hitanum aðeins að rjúka úr.
- Penslið örþunnu lagi af BBQ chilli sósu á rifin beggja megin og grillið á vel heitu grilli skamma stund (þetta gert til þess að fá stökka húð á kjötið).
- Takið af grillinu og penslið 1-2 x sósu á báðar hliðar að nýju, skerið niður, stráið smá sesamfræjum yfir til skrauts og berið fram með sumarsalsa. Einnig er gott að hafa franskar kartöflur með.
Sumarsalsa uppskrift
- 1 x rauð paprika
- 1 x appelsínugul paprika
- 2 x ferskur maís
- ¼ vorlaukur (saxaður smátt)
- 3 x tómatur (kjarnhreinsaður og skorinn smátt niður)
- 1 x avókadó (skorið í teninga)
- ½ lime (safinn)
- 2 msk. saxað kóríander
- Grillið paprikurnar í heilu lagi á meðalheitu grilli í 10-15 mínútur, snúið reglulega og leyfið þeim síðan að kólna niður.
- Takið maísinn úr hýðinu og sjóðið í um 5 mínútur, þerrið og grillið í nokkrar mínútur allan hringinn til að fá smá grilláferð á þá.
- Flettið síðan skinninu/ysta laginu af paprikunum af og takið kjarnann/steinana úr, skerið næst í litla bita.
- Skafið baunirnar af maísnum og bætið í skál með paprikunum.
- Setjið næst allt annað út í og blandið varlega saman, njótið með nýgrilluðum rifjum.
Chilli BBQ sósan rífur örlítið í án þess að vera of sterk samt, aðallega virkilega ljúffeng bara myndi ég segja svo það er algjör óþarfi að spara hana!
Þessi færsla er unnin í samstarfi við Gerum daginn girnilegan!
