Hér er á ferðinni undursamlegt og sumarlegt salat með grilluðum humri! Við grilluðum þetta salat í hádeginu einn daginn í vikunni og það kláraðist upp til agna og við munum klárlega útbúa það aftur á næstunni.
Mmmm……klettasalat, jarðarber, mangó og furuhnetur eru ein besta salatblanda sem ég veit!
Humarsalat uppskrift
Léttur réttur eða forréttur fyrir 4-5 manns
Grillaður humar
- Um 660 g skelflettur humar frá Sælkerafiski (2 pk)
- 1/3 sítróna (safinn)
- 2 msk. ólífuolía
- 2 hvítlauksrif (rifin)
- ½ tsk. salt
- ½ tsk. hvítlauksduft
- ¼ tsk. pipar
- Skolið og þerrið humarinn vel.
- Blandið öllu öðru saman í skál og leyfið humrinum síðan að marinerast í leginum í að minnsta kosti 3 klukkustundir eða yfir nótt.
- Raðið humri þétt upp á grillspjót og grillið á heitu grilli í um 2 mínútur á hvorri hlið eða þar til humarinn er eldaður í gegn. Gott er að spreyja PAM matarolíuspreyi á grindina áður en þið leggið humarspjótin niður.
- Raðið humarspjótunum ofan á salatið og njótið með ísköldu Muga hvítvíni. Einnig mætti rista hvítlausbrauð með þessum rétti.
Salat og dressing
- 1 poki klettasalat
- ½ þroskað mangó
- Um 6 stk. Driscolls jarðarber
- Fetaostur eftir smekk
- Ristaðar furuhnetur eftir smekk
- Heinz hvítlausdressing á flösku
- Skerið niður mangó og jarðarber.
- Raðið öllu saman í skál og leggið humarspjótin yfir.
- Sprautið hvítlauksdressingu yfir allt.
Það er ofureinfalt að útbúa grillspjótin með því að kaupa skelflettan humar!
Ískalt hvítvín fer síðan einstaklega vel með þessu dásamlega salati, mmmmmm!
