Hér eru á ferðinni undur ljúffengir smjördeigssnúðar með skinku og osti. Þetta var sko alvöru djúsí bakkelsi og er sniðugt hvort sem heldur með kaffinu eða í nesti í ferðalagið eða gönguna.
Smjördeigssnúðar
Um 15 stykki
- Tilbúið smjördeig (5 plötur/430 g)
- 300 g skinkukurl
- 60 g rifinn cheddar ostur
- 60 g rifinn mozzarella ostur
- 90 g Hellmann‘s majónes
- 1 msk. hunangs Dijon sinnep
- ½ tsk. salt
- ¼ tsk. pipar
- 20 g brætt smjör
- Birkifræ
- Hitið ofninn í 180°C.
- Affrystið smjördeigið og raðið plötunum þétt upp við hvor aðra og klemmið hliðarnar á plötunum saman eins og þið getið. Gott að setja smá vatn á fingurna til að deigið festist betur saman.
- Setjið annan bökunarpappír yfir og snúið deiginu við, klemmið nú saman á hinni hliðinni með sama hætti.
- Næst má hræra saman majónesi, sinnepi, salti og pipar og smyrja yfir deigið.
- Stráið síðan skinku og osti jafnt yfir allt og rúllið upp í lengju.
- Skerið niður í um 2 cm þykka snúða, raðið á bökunarpappír á bökunarplötu og klemmið endann við eins og þið getið svo hann muni ekki standa út í loftið þegar búið er að baka snúðana, hér er líka gott að setja smá vatn á fingurna.
- Penslið með bræddu smjöri og bakið í um 22 mínútur eða þar til snúðarnir eru farnir að gyllast á köntunum.
Mmmmm þessir eru svo góðir að þið verðið að prófa!
