Ostabakkar eru alltaf vinsælir, sérstaklega yfir stigagjöfinni á Júróvision! Ég útbjó þennan ostabakka á dögunum fyrir Fréttablaðið og þessi bakaði ostur með jarðarberjum og myntu er undursamlegur!
Mmmmm, algjörlega 10 í einkunn fyrir þennan ost!
Ég var að prófa að gera salami-rós í fyrsta skipti og það er skemmtileg leið til þess að bjóða upp á slíkt góðgæti.
Það er bara eitthvað við bakaða osta sem enginn fær staðist! Ég held ég gæti fundið endalausar útfærslur af slíkum!
Júróvision ostabakkinn 2022
Bakaður ostur með jarðarberjum og myntu
- 1 x Brie ostur
- 200 g jarðarber (skorin í teninga)
- 1 msk. púðursykur
- 1 msk. balsamik glaze
- 2 msk. hunang
- 1 lúka saxaðar kasjúhnetur
- Nokkur myntulauf (söxuð)
- Hitið ofninn í 180°C og setjið ostinn í eldfast mót.
- Bakið hann í um 10 mínútur og útbúið jarðarberjatoppinn á meðan.
- Hitið saman púðursykur, balsamik glaze og hunang þar til sykurinn er bráðinn.
- Takið af hellunni og hrærið jarðarberjunum varlega saman við.
- Hellið yfir ostinn þegar hann kemur úr ofninum og toppið með söxuðum kasjúhnetum og vel af myntu!
Annað á ostabakka
- Salamirós (ég notaði ítalska salami með kryddkanti, um 10 sneiðar)
- Grissini stangir vafðar í hráskinku
- Chili sulta
- Grettir ostur
- Möndlur
- Döðlur
- Súkkulaðihjúpaðar hnetur og ávextir
- Jarðarber
- Ostateningar (Gouda sterkur)
- Ritz kex/annað kex
Með hækkandi sól passar einstaklega vel að bjóða upp á rósavín með ostunum, það er klárlega hin fullkomna tvenna!
