Ég er að detta í jólagírinn, einhverjar seríur komnar upp og stelpurnar komnar með jólatré inn í herbergin sín. Það er því vel við hæfi að byrja að vinna jólauppskriftir og hér kemur fyrsta formlega jólauppskriftin í ár, þar sem ég tók Betty vinkonu mína á næsta „level“ og útkoman varð dásamleg og ljúffeng gulrótarkaka með kanilkeim.
Skreytingin er þannig að hana ættu allir að ráða við svo ég mæli sannarlega með þessari köku á aðventunni.
Gulrótarkaka í jólabúningi
Fyrir 10-12 manns
Gulrótarkökubotnar
- 1 x Betty Crocker gulrótarkökumix
- 4 egg
- 130 ml Isio 4 matarolía
- 200 ml vatn
- 1 tsk. kanill
- 2 tsk. vanilludropar
- 1 x Royal karamellubúðingur
- Hitið ofninn í 160°C og spreyið 3 x 15 cm kökuform vel að innan með matarolíuspreyi.
- Hrærið saman eggjum, vatni og olíu.
- Bætið gulrótarkökuduftinu saman við ásamt kanil og vanilludropum, blandið vel saman og skafið niður á milli.
- Bætið búðingsduftinu saman við í lokin og hrærið stutta stund í viðbót.
- Skiptið deiginu jafnt niður í formin og bakið í um 25 mínútur eða þar til prjónn kemur út með smá kökumylsnu á endanum, ekki blautu deigi.
- Kælið botnana og skerið síðan ofan af þeim áður en þið setjið krem á milli og skreytið.
Rjómaostakrem uppskrift
- 2 x Betty Crocker Cream Cheese Icing
- 200 g flórsykur
- 2 tsk. vanilludropar
- Þeytið allt saman og skafið niður á milli.
- Smyrjið um 1 cm þykku lagi á milli botna og þekið kökuna með örþunnu lagi á hliðunum en um 1 cm þykku lagi á toppnum.
- Leyfið umfram magni að fara aðeins fram af brúninni þegar þið sléttið toppinn, takið síðan stóran kökuspaða til að slétta hliðina vel. Þá ýtist aðeins af umfram kreminu aftur upp á toppinn en í stað þess að „veiða“ það burt eins og gert er þegar þið viljið slétta kanta, þá leyfið þið því að standa svona ósléttu.
Skreyting
- 3 tilbúnir piparkökukallar
- Rósmaríngreinar
- Gróft Til hamingju kókosmjöl
- Mini sykurpúðar
- Nokkrar Maltesers kúlur
- Stingið tveimur piparkökuköllum ofan á kökuna, setjið smá krem á þann þriðja og festið hann á hliðina.
- Setjið síðan nokkra sykurpúða, Malteserskúlur og smá kókosmjöl yfir kökuna ásamt því að stinga nokkrum rósmaríngreinum í hana.
Það er svo gaman að leika sér með kökumix, það lærði ég á meðan ég bjó í Bandaríkjunum!
Ég ákvað að prófa þetta Cream Cheese frosting í fyrsta skipti í stað vanillu og það er virkilega ljúffengt.
Hó, hó, hó!
