Elsta mín varð 20 ára í síðustu viku! Þegar ég spurði hana hvernig köku hún vildi segir hún „Mig langar í gamaldags hjartaköku með blúndumynstri með góða jarðarberjakreminu á milli sem þú gerðir einu sinni fyrir skautafjáröflun“. Ég þurfti alveg að klóra mér aðeins í hausnum því ég mundi ekki nógu vel eftir kreminu en síðan áttuðum við okkur á því að það voru þessar kökur hér sem hún var að tala um svo ég útfærði það krem til að þola það að vera á milli á þetta stórri köku.
Ég átti hins vegar ekki hjartakökuform svo ég fann slík í Byggt & búið og við gúgluðum aðeins „vintage cakes“ þar sem ég hef ekki séð mikið um þetta hér heima. Stelpurnar í Bake My Day í Kaupmannahöfn eru algjörir snillingar og sá ég nokkrar skreytingahugmyndir hjá þeim sem við vorum ánægðar með svo við bara fórum af stað með þetta.
„Vintage“ hjartakaka
Súkkulaðibotnar
- 2 x Betty Crocker Devils Food Cake mix
- 3 msk. bökunarkakó
- 250 ml Isio matarolía
- 500 ml vatn
- 7 egg
- 1 x Royal súkkulaðibúðingur
- Hitið ofninn í 160°C.
- Blandið saman eggjum, vatni og matarolíu í skál.
- Bætið kökuduftinu ásamt kakóinu saman við og hrærið saman í um 2 mínútur, skafið niður á milli.
- Að lokum má setja búðingsduftið saman við deigið og blanda stutta stund til viðbótar.
- Spreyið matarolíuspreyi/smyrjið formin vel og setjið rúmlega 500 g af deigi í hvert form.
- Bakið í um 25 mínútur eða þar til prjónn kemur út með smá kökumylsnu á endanum, ekki blautu deigi.
- Kælið botnana alveg, skerið þá ofan af þeim til að jafna þá og setjið jarðarberjakrem á milli.
Jarðarberjakrem á milli hæða
- 140 g smjör við stofuhita
- 600 g flórsykur
- 100 g jarðarber (stöppuð gróft)
- 1 tsk. vanillusykur
- Þeytið smjörið þar til það verður létt í sér og bætið þá hluta af flórsykrinum saman við, þeytið og skafið niður á milli.
- Bætið næst stöppuðum jarðarberjum, vanillusykri og restinni af flórsykrinum (í nokkrum skömmtum) saman við og þeytið vel og skafið niður á milli þar til þykkt en létt jarðarberjakrem hefur myndast.
- Skiptið kreminu í 3 hluta og smyrjið á milli botnanna, setjið kökuna næst í kæli á meðan næsta krem er útbúið.
Smjörkrem utan á köku
- 4 dósir Betty Crocker Vanilla frosting
- 400 g flórsykur
- Sósulitur/matarlitur
- Þeytið saman vanillukrem og flórsykur þar til létt og fallegt hvítt krem hefur myndast.
- Setjið um 1/3 af kreminu til hliðar og litið restina í þeim lit sem þið óskið.
- Til þess að fá drappaðan lit má ýmist nota matarlit eða smá sósulit eins og við gerðum þetta skiptið því það var ekki annað til (bragðið fannst ekkert í gegn þetta var svo lítið).
- Þekjið næst kökuna að utan með þunnu lagi af drapplituðu kremi, kælið í um 15 mínútur og endurtakið síðan leikinn með aðeins þykkara lagi af kremi.
- Setjið næst drapplitað krem í sprautupoka með litlum laufastút annars vegar og litlum stjörnustút hins vegar. Setjið hvítt krem í poka með stórum og þéttum stjörnustút annars vegar og stórum laufastút hins vegar.
- Sprautið með því mynstri sem ykkur þykir fallegt, ég notaði stjörnustútana neðst á botninn og efst á kantinn/toppinn, síðan laufastútana til að gera „blúndur“ á hliðarnar, setti síðan stórar sykurperlur á samskeytin til að fela þau.
Æji þetta er svo krúttlegt og ég á klárlega eftir að útbúa fleiri svona í framtíðinni og langar einmittað prófa fleiri liti og skemmtilegheit.
Þetta fallega kökuskilti kemur síðan frá Hlutprent en það er í letri og anda „vintage“ kökunnar.
