Ég veit ekki hvort þið munið eftir vatnsdeigslengjunum sem ég gerði fyrir Bolludaginn en sú fylling var svo brjálæðislega góð að ég ákvað að útfæra hana yfir á púðursykursmarengs. Útkoman varð þessi dásamlegi mokkamarengs sem er hinn fullkomni eftirréttur eða góðgæti með kaffinu.
Namm þetta var svoooooo gott!
Mokkamarengs uppskrift
Um 8 litlar pavlovur
Marengs uppskrift
- 3 eggjahvítur
- 3 dl púðursykur
- Hitið ofninn í 150°C.
- Þeytið eggjahvítur þar til þær fara aðeins að freyða.
- Bætið þá sykrinum saman við í nokkrum skömmtum og hrærið þar til stífþeytt.
- Sprautið marengs í „bollur“ á bökunarpappír, notið síðan bakhlið á teskeið til að móta holu ofan í þær og mynda þannig nokkurs konar skálar (til að fylla síðan með rjómanum).
- Bakið í 25 mínútur og leyfið að kólna með ofninum.
- Fyllið og skreytið.
Súkkulaðisósa
- 100 g Toblerone
- 50 ml rjómi
- Bræðið saman í potti og leyfið að ná stofuhita á meðan þið útbúið fyllinguna.
Fylling og skraut
- 500 ml rjómi
- 1 msk. fínmalað instant kaffiduft
- 100 g smátt saxað Toffifee + annað eins til skrauts
- Súkkulaðisósa (sjá uppskrift að ofan)
- 8 heilir Toffifee molar
- Blóm (má sleppa)
- Þeytið saman rjóma og instant kaffiduft.
- Blandið 100 g af söxuðu Toffifee varlega saman við með sleikju.
- Sprautið í marengsskálarnar og toppið með söxuðu Toffifee, heilu Toffifee, súkkulaðisósu og blómum.
Toffifee er svo gott nammi! Það er stórhættulegt fyrir mig að opna svona kassa því áður en ég veit af er hann búinn, tíhí!
Þessi færsla er unnin í samstarfi við Gerum daginn girnilegan
