Þessar bollakökur eru sannarlega með kremtopp í lagi! Flöffí sykurpúðakrem sem ekkert mál er að gera er sett á kökurnar og fryst í stutta stund áður en þeim er síðan dýft í súkkulaði, namm!
Hversu girnilegar!
Kókosbollubollakökur
Athugið að gott er að setja pappaform ofan í álform til þess að kökurnar haldi fallegri lögun og auðveldara sé að fylla formin. Í þessari uppskrift má fylla um ¾ af forminu þar sem kremið er mikið og gott að hafa kökuna eins stóra og mögulegt er.
Bollakökur uppskrift
- 1 x Betty Crocker Devils Food Cake Mix
- 4 egg
- 125 ml matarolía
- 250 ml vatn
- 3 msk. bökunarkakó
- 100 g brætt suðusúkkulaði
- Hitið ofninn í 160°C og takið til bollakökuform.
- Hrærið saman eggjum, olíu og vatni.
- Bætið kökudufti og bökunarkakó saman við og hrærið í nokkrar mínútur.
- Að lokum fer brædda súkkulaðið í blönduna og henni síðan skipt niður í um 20 bollakökuform.
- Kælið kökurnar og útbúið síðan kremið.
Kókosbollukrem uppskrift
- 6 eggjahvítur
- 500 g sykur
- 100 ml vatn
- 1 tsk. Cream of tartar
- 1 msk. vanilludropar
- Pískið saman eggjahvítur, sykur, vatn og Cream of tartar í skál.
- Setjið skálina yfir pott með sjóðandi vatni og hrærið í þar til þið finnið að sykurinn er orðinn uppleystur og blandan orðin volg, færið hana þá yfir í hrærivélarskálina (eða þeytið með handþeytara).
- Þeytið á hæsta hraða þar til stífir toppar myndast (um 10-12 mínútur í hrærivél).
- Bætið vanilludropunum saman við í lokin og þeytið í um eina mínútu til viðbótar.
- Setjið kremið í stóran hringlaga sprautustút og sprautið eins ísmunstri ofan á hverja köku (um 3 hringir).
- Stingið kökunum í frysti í 15-30 mínútur og dýfið þeim síðan í súkkulaði.
Hjúpur
- 500 g suðusúkkulaði
- 3 msk. ljós matarolía
- Bræðið súkkulaði og hrærið matarolíu síðan vel saman við til að þynna aðeins.
- Setjið súkkulaðiblönduna í grannt og djúpt ílát (þó þannig að höndin ykkar og kakan komist að).
- Sækið eina og eina köku í frystinn og dýfið eins og þið séuð að setja ídýfu á ís.
- Haldið á hvolfi á meðan súkkulaðið lekur af og snúið síðan upprétt og leggið á disk.
- Mikilvægt er að geyma kökurnar í kæli þar til þær eru borðaðar.
Það er alls ekki flókið að útbúa svona dásemdar bollakökur og þær eru sko sannarlega þess virði, trúið mér!
