Fílakaramellubrownies

Þessar brownies eru með þeim betri sem ég hef útbúið. Það er síðan svo auðvelt og þægilegt að bræða saman karamellur og rjóma í potti fyrir krem, einfaldara getur það ekki verið. Hægt er að bjóða upp á þessa köku eina og sér eða skera hana í minni bita og hafa sem hluta af sætum bitum á borði.

Fílakaramellur eru auðvitað löngu búnar að fanga hug og hjörtu landsmanna og þær má svo sannarlega nota í annað en að borða þær beint úr bréfinu.

Brownies uppskrift

210 g smjör
220 g suðusúkkulaði
300 g sykur
4 egg
100 g hveiti
40 g Cadbury bökunarkakó
½ tsk. salt
100 g Toblerone
Bláber og flórsykur til skrauts

Hitið ofninn í 180°C.
Bræðið smjör og suðusúkkulaði í vatnsbaði og leyfið hitanum aðeins að rjúka úr.
Þeytið egg og sykur þar til létt og ljóst.
Bætið súkkulaðiblöndunni saman við í mjórri bunu og blandið vel.
Sigtið hveiti, kakó og salt yfir skálina og vefjið saman við með sleif.
Saxið Toblerone gróft niður og vefjið að lokum saman við deigið.
Klæðið ferkantað form (um 25 x 25 cm) með bökunarpappír og spreyið vel með matarolíuspreyi.
Hellið deiginu í formið og bakið í um 40 mínútur eða þar til prjónn kemur út með smá kökumylsnu á, ekki blautu deigi.
Kælið alveg í forminu og hellið þá fílakaramellukreminu yfir, kælið aftur og skerið síðan niður í teninga og skreytið með bláberjum og flórsykri.

Fílakaramellukrem

300 g Fílakaramellur
6 msk. rjómi

Bræðið saman í potti við miðlungshita þar til karamellurnar hafa bráðnað, hrærið vel í allan tímann.
Hellið yfir kökuna í forminu, kælið þar til kremið hefur þykknað, lyftið þá upp úr forminu og skerið kökuna niður í teninga.