Það er fátt betra en púðursykurmarengs að mínu mati! Hvað þá þegar búið er að toppa slíka tertu með ljúffengri karamellu í allar áttir, namm þessi er sko B O B A eins og Bubbi myndi segja það!
Yndislega Heiða mágkona mín gaf mér þennan fallega kökudisk í afmælisgjöf í nóvember og loksins kom tækifæri til að nota hann.
Karamellumarengs
Marengsbotnar uppskrift
- 5 eggjahvítur
- 220 g púðursykur
- Hitið ofninn í 130°C.
- Þeytið eggjahvíturnar þar til þær fara aðeins að freyða.
- Bætið sykrinum saman við í nokkrum skömmtum og stífþeytið þar til topparnir halda sér.
- Teiknið tvo um 20 cm hringi í þvermál á sitthvorn bökunarpappírinn á bökunarplötu og dreifið úr marengsblöndunni.
- Bakið í 60 mínútur, slökkvið á ofninum og leyfið botnunum að kólna með ofninum.
Karamella uppskrift
- 180 g Dumle karamellur (1 ½ poki)
- 70 ml rjómi
- Bræðið saman í potti við meðalháan hita þar til karamellurnar hafa bráðnað.
- Setjið um helming karamellunnar á neðri marengsbotninn og leyfið henni að kólna áður en þið setjið rjómann yfir.
- Setjið síðan restina ofan á seinni botninn áður en þið toppið með rjóma, berjum og súkkulaði.
Fylling og skraut
- 600 ml þeyttur rjómi
- 130 g saxað Toblerone
- Driscolls hindber og jarðarber
- Blóm
- Blandið um 100 g af söxuðu Toblerone varlega saman við rjómann.
- Setjið um 2/3 blöndunnar á milli botnanna (yfir karamelluna).
- Setjið næsta botn ofan á, restina af karamellunni og um 1/3 sem eftir er af rjómanum.
- Toppið rjómann síðan með berjum, söxuðu Toblerone og blómum.
Namm þetta er svo undursamleg terta og marengstertur hitta alltaf í mark!
Það er eitthvað við það að toppa kökur með ferskum blómum. Jafnvel skakka og krúttlega marengstertu eins og þessa, sem gerir hana svo fallega.
Svo má alveg skella nokkrum stjörnuljósum á toppinn því það er aaaaaaaaaaaaaaalveg að koma nýtt ár!
